ഈ നീലവാനില് നിന്നാദ്യമായ് ഭൂമിയില്
പെയ്തിറങ്ങുന്ന മഴത്തുള്ളിപോലെ നീ
ആര്ദ്രമാമെന് ഹൃദയത്തിന്റെയാഴത്തിലൊരു-
കുളിര്മഴയായ് പെയ്തിറങ്ങി
ഒരുനോക്ക് കാണുവാനൊരുവാക്കുമിണ്ടുവാ-
നൊരുപാട് നാള് ഞാന് കാത്തിരുന്നൂ സഖീ
ഒരുമാത്ര നിന്ചാരെ വന്നു നിന്നെങ്കിലും
നിന്റെ കണ്ണിമകളില് എന്നെ മറന്നു ഞാന്
അറിയില്ലെനിക്കിന്നുമവളുടെ കണ്കളില്
ഞാന് കണ്ടതവള്തന്റെ പ്രണയമാണോയെന്ന്
നീയെന്റെ സ്നേഹത്തെയറിയുന്നുവെങ്കിലും
അറിയാതെ കാലങ്ങളരികത്തിരിക്കിലും
നിന്റെ കണ്പീലിതന് തഴുകലേറ്റുലയുവാന്
നിന് കണ്മഷിയാകുവാന് അനുവദിക്കൂ പ്രിയേ…
–വിഷ്ണു.ജി.ബി